رباعية الحروف {1} كلمات الطيب عبدالله جبريل
رباعية الحروف (1)
دموعي ما وقفت
قدر ما قلت احاربا
قطرت وحياتك دم
انت فاكرة بغصبها
شمسنا ما شرقت
سمانا خبت سحبا
سنين ما أمطرت
غير نيران شهبا
الديار والله حزينة
الشالك سعادتها نهبا
لا خفتوا فينا الله
ولا ناس وقفة قلبا
كتمتي أنفاس أماسينا
الجاية من الله هبة
هدمتي معاك أمانينا
ضاع وراك عمر الصبا
حليلك رباعية الحروف
صوتك عصافيرنا يطربا
تتمائل غصون اشجارنا
تتراقص مع خطاك ظبا
لبستي قلوبنا تاج
هدهدنا يوماتي جايب نبأ
طوي عدن فيافي الحجاز
يا الفقتي بلقيس وسبا
عشرة سنين مرت ايام
ما زلت جراحي اطبطبا
ما سكنت قلبي حبيبة
ولا بنية اخطبا
قصة ريدك أحلام
محال يوم اشطبة
لي درس وللايام
الريد أقسام ما موهبة
عيوني ما نامت
ولا جفن يزربا
صادقه في ريدها
منو البقدر يكذبا
كلما طل صباح يشبهك
كل الجوارح يا مرحبا
زي الخلوق محتارة
في الدنيا ياتو كوكبا
رباعية الحروف
روحي ليك انسبها
ريدك تعداد النجوم
العشاق ما قدرت تحسبها
الدنيا قبايل عيد
يا ربي الأعياد قربها
اي زول مفارق وطنو
يرجع مكان ربا
رباعية الأعياد دونك
شروق شمس دون مغربا
برقا يلوح يضوي
دون مطرتا يكبكبا
قدر ما باركت عيد
ايدك في الأيادي غائبة
العيون المشتاقه تبكي
قولي لي ايه ذنبا
ريدتنا السامية صادقة
بقت الناس تانبا
الحب الحلال
ليش تخالطو بالربا
بريبيرة ياها ديارك
تراب رجلك لما حبا
ليه تقسي بالرحيل
قلبك العشرة يخربا
ما شفتي حزن ديارنا
ما قايلين انت سببا
ما جف والله جفن
كنا الدموع بنشربا
شايل هموم واحزان
غربة في عز الصبا
الا أطياف ذكراك
صعب علي اغلبها
يوم صبحانة مسافرة
قلت احوالي ادربا
الا المشاعر هاجت
حظوظي دايما اندبا
دموع المقل فاضت
نزلت دون اكبكبا
ديمة ساتر حالي
نفسي أمامك اهذبا
الا يا رباعية وحاتك
نيران بعدك ملهبة
يوماتي موقدة فيني
بردا وسلاما حطبة
قدر ما غرستها نخلة
اقول باكر اجني رطبة
تقابلني بتلويح الوداع
القي نفسي زارع طنضبة
الرئيسية 
